D’Grondschoul fir alleguer d’Zyklen ass am Haaptuert vun der Gemeng, zu Useldeng. D'Schoul läit an der Natur, um Rand vun engem Duerf dat räich u Geschicht, Kultur a Patrimoine ass.

D’Gemeng huet ronn 2000 Awunner a besteet aus 4 Uertschaften :

• Useldeng
• Schandel
• Rippweiler
• Iewerleng.

Ee villsäitege Site zënter 2003

• D’Schoul Useldeng mat funktionnelle Klassesäll, engem Bastelsall/Bibliothéik, an enger Konferenz, empfänkt ronn 210 Schüler, opgedeelt op 4 Zyklen a 15 Klassen.

• D’Maison Relais betreit d’Kanner nieft de Schoulzäiten a bitt hinne villsäiteg Aktivitéiten un.
• D’Kantin, wou d’Kanner an der Mëttesstonn ofwiesslungsräich a gesond Moolzechten zerwéiert kréien.
• Déi 3-fach Sportshal, equipéiert mat verschiddenstem Material fir all Alter a Besoin, erméiglecht flott Turnstonnen.

• Den naturfrëndlechen a kannergerechte Schoulhaff mat den Hecken an Attraktiounen, an de Fussballterrain wou d’Kanner sech op kreativ a spilleresch Aart a Weis an de Pause kënnen austoben. De Schoulhaff gouf 2013 an Zesummenaarbecht mat den Elteren an der Gemeng ënnert der Leedung vun "Holunderschule" frësch amenagéiert.

D'Schoul Useldeng erlaabt et d'Kand an de Mëttelpunkt ze setzen, a seng individuell pedagogesch Besoin'en ze respektéieren.

D'Equipe pédagogique beméit sech an alle Beräicher present, aktiv a flexibel ze sinn an op d'Besoine vu jidderengem anzegoen. Dem Personal läit vill dorun, fir all Schüler op eng tolerant Aart a Weis, déi duerch Deelen an Zesummenhalt gekennzeechent ass, autonom a responsabel ze erzéien an den Opbau vu Wëssen a Kompetenzen ze garantéieren.

D'Schoul Useldeng gehéiert zur Regioun 13 an ënnersteet dem Ministère de l'Education nationale, de l'Enfance et de la Jeunesse an der Gemeng Useldeng.