Dëst Joer hate mir e puer léiwe Besuch an eise Klassen: d'Madamm Kim Klein koum sech mat hirem Golden Retriver-Weibchen Salma virstellen. D'Salma schafft zënter engem Joer an der Seniorie Saint Joseph zu Péiteng als Therapiemupp bei den eelere Residenten. Si bréngt hinnen do ee Laachen op d'Gesiicht. Dës Freeg huet d'Salma och bei eis Schoulkanner bruecht, sou wéi dir et op dëse Fotoe gesidd.

Dem Salma seng Ausbildung zum Therapiehond ass vun der ASA finanzéiert ginn. Wann Dir och hëllefe wëllt fir weider esou Muppen wéi d'Salma auszebilden, braucht dir nëmmen Plastiks- a Korkstëpp ze sammelen, an déi an d'Schoul oder op d'Gemeng ze bréngen. Och wann d'Stëpp elo méi schwéier vun de Fläsche lassginn, et brauch een nëmmen eemol fest ze rappen, a schonn hutt dir eppes Guddes gemaach.

All dräi Joer organiséiert d'Suessemer Schoul ee Bichermoart. D'Zil vun deem Moart ass et de Bicher, déi scho gelies goufen an doheem verstëpsen, een zweet Liewen ze schenken. D'Kanner konnten hir Occasiounskannerbicher mat an d'Schoul bréngen. Et gouf ee Verkafspräis je nom Editiounsjoer oder Déckt vum Buch festgeluecht. De 14. Mee goufen ronn 1000 Bicher am Hall Polyvalent zum Verkaf ausgestallt. Méi wéi 1700€ koumen eran a sinn zréck un eis jonk Verkeefer gaangen.