Mëttwoch, den 2. Mäerz fënnt um 16h00 d'Finale vum Virliesconcours vum C4 vun der Schoul Suessem statt.
Déi Kanner, déi matmaache wëllen, kënnen sech am ale Gebai op d'Lëscht, déi um Rez-de-chaussée um schwaarze Raider hänkt, androen.
D'Thema vum Text ass : Déieren.
Aus dem Flyer:
"Déiere gouf et schonn iert de Mënsch koum. Mënsch an Déier hunn eng laang gemeinsam Geschicht. Am Laf vun der Zäit si verschidden Déieren zu Notzdéiere ginn an anerer zu Hausdéieren. Deels sinn dat och déiselwecht Déieren. Haut sinn Hausdéiere ganz dacks wichteg Frënn a si hëllefen de Mënschen. Dëst gëllt bei eenzelne Mënsche mat Beanträchtegungen och fir hir Assistenzdéieren.
Et ginn och nach ëmmer wëll Déieren, déi fräi liewen an déi eis dacks faszinéieren. Vill vun hinne sinn antëschent bedrot a musse vum Mënsch – an heiansdo virum Mënsch – geschützt ginn.
D’Relatioun Mënsch-Déier ass am Wandel: verschidde Mënsche stellen sech d’Fro, a wéiwäit de Mënsch iwwer d’Déieren däerf bestëmmen. Mat där laanger Relatioun tëscht Mënsch an Déier projezéiere mir och ganz vill Mënschleches an d’Déieren eran. Mir maachen aus deenen engen Déieren déi Domm, aus aneren déi Béis, déi Gewëtzt oder déi Geféierlech. Et ginn och eng Rëtsch Bicher, an deenen d’Déiere selwer hir Geschicht erzielen. Dat kënnen Déieren an der aktueller Welt, aus der Geschicht oder Virgeschicht, awer och Déieren aus Fantasiewelte sinn.
D’Déieren hunn also eng grouss Präsenz a Bedeitung an eisem Liewen, an dat war fir eis de Grond, se als Theema fir de Virliesconcours 2022 erauszesichen.
Fir de Virliesconcours kënnen all Zorte vun Déieregeschichten, respektiv Geschichten tëscht Mënsch an Déier, genotzt ginn.
Et kann erëm an den dräi Schoulsprooche virgelies ginn: Däitsch, Lëtzebuergesch oder Franséisch.
D’Finall ass dëst Joer dënschdes, den 28. Juni 2022. Wéinst den aktuelle speziellen Ëmstänn wäert d’Finall wuel nomëttes sinn, sou dass jidder Finalist vun e puer Membere vun der Famill a vu Frënn ënnerstëtzt ka ginn.
Dem Virliesconcours 2022 wënschen ech e grousse Succès, an all deenen, déi matmaachen, vill Spaass."
(Luc Weis, Direkter vum SCRIPT)
