Mir hunn déi lescht Kéieren vill um däitsche Wuertschatz an um Sazbau geschafft. Dat hu mer zum Beispill mat Käertercher a Würfele gemaach. All Kand würfelt an ännert déi Elementer, déi beim Würfele gewise goufen (Sujet, Verb, Objet). Esou gëtt de Sazbau oft widderholl an d'Ënnerscheeder an der Konjugaison vun de Verbe gi verdäitlecht.

Mir hunn awer och vill am Rechne geschafft, och mat Würfelen. Do ginn et immens vill verschidde Méiglechkeeten:

Fir déi aus dem Cycle 2: just d'Zuel benennen (eestelleg an zweestelleg), d'Zuel verduebelen...

fir se alleguer: Wéivill feelt bis 10, déi eng Zuel minus déi aner...

fir déi grouss: Wéivill feelt bis 100, zwou Zuele multiplizéieren (1mal1)...

E beléift Spill ass den TickTackBumm. D'Kanner mussen heibäi Wierder sichen, déi eng bestëmmte Buchstawefolleg (op enger Käertchen) hunn. Fir d'Kanner aus dem Cycle 2 geet et duer, wann si e Wuert mat deem richtegen Anlaut fannen. Natierlech dierfe si och déi ganz Buchstawefolleg gebrauchen. Esou gëtt de Wuertschatz mobiliséiert an si léieren d'Wuertfamille kennen. Ganz oft kann een zesummegesate Wierder gebrauche, déi méi liicht ze fannen sinn wéi ganz neier.

An Zesummenaarbecht mat der Maison Relas (en décke Merci un si) konnte mer eng Woch an d'Zeeche vum Airtramp setzen. All Cycle konnt dovu profitéieren a verschidde Spiller op deem grousse Loftkësse maachen. D'Kanner ware begeeschtert!

Nodeem mer e puer Dréchenübunge an der Klass gemaach hunn fir d'Kniet an d'Ustrécken ze léieren, ware mer elo schon zwee mol an der Kloterhal zu Zolwer. Do hu mer eis fir d'éischt spillerech waarm gemaach an e puer Kloterspiller am Boulderraum gemaach. Duerno ass erkläert ginn, wéi dat mam Ustrécken, Sécheren an Erofloosse fonktionnéiert a mir hunn eis éischt Versich gemaach. Verschiddener konnten och schon an der grousser Hall testen, wéi héich se kommen. E grousse Merci fir d'Ënnerstëtzung vun der Maison Relais.

Haut war ab 16:00 Auer d'Wanterfest vun der Eilerenger Schoul. Mir soen alle Leit Merci, déi sech Zäit geholl hun op d'Fest ze kommen oder souguer ze hëllefen!