Meng Klass - Blog

Leschte Méinden hu mer eis üblech Spiller duerchgeholl: TicTacBoom, Killer... Mir hunn awer och vum gudde Wieder profitéiert an dobausse d'Konjugatioun vun den däitsche Verben duerchgeholl. D'Kanner hu missen Verbekäertercher op déi richteg Plaz an engem Tableau à double entrée leeën. Déi grouss hunn och de Präteritum vum jeweilege (staarke?) Verb misse soen. Duerno hu mer eis d'Endungen an de Verbstamm e bësse méi genee ugekuckt an déi verschidden Endunge bemierkt.

Mer hunn och nach Zuele gewürfelt, d'Kanner hu sech dunn esou opgestallt, dass d'Zomm (bei deene klengen) oder d'Produkt (bei deene groussen) vun deenen zwou Zuelen duergestallt gëtt. Méi spéid hu mer op déi selwescht Aart a Weis zweestelleg Zuelen gebaut.

Fotoen a Video'e vu Fiesch fannt Der op http://colonies-sanem.schoul.lu

Haut sinn d'Klima an de Klimaschutz d'Haaptthemen an der Schoul Eilereng. An alle Cycles ass dës Woch iwwer d'Problematik vu Klima an Emweltverschmotzung geschwat ginn. Haut sinn dës Projeten ofgeschloss ginn, an ab 10:00 gëtt alles am Kulturschapp virun alle Klasse virgestallt. De Mëtteg ginn an allen Ateliers Biller zum Thema gemolt. D'Schoul Eilereng ënnerstëtzt domat de Mouvement vu Youth For Climate an och all Schüler aus dem Lycée, déi haut um Glacis fir eng besser Welt streiken.

Haut stung vill Sazbau um Programm. D'Kanner hu Säz zesummegebaut. Déi Grouss hun Säz op franséisch zesummegebaut, duerno hu si deene Klenge gehollef andeem se hinne gesot hunn, ob nach e Feeler an hierem (natierlech däitsche) Saz wier oder net. Dobäi si verschidde Reegele widderholl ginn. Ganz interessant war et herno d'Säz méi genee ze kucken a verschidden Unuerdnunge vun de Wierder ze analyséieren. Wéi eng Sazstrukture si méiglech, wéi eng si net richteg...

Donieft hu mer erëm eist Rechespill gemaach, dës Kéier huet et geheescht: grouss géint kleng. Natierlech war d'Aufgabestellung anescht. Déi Grouss hun 1mal1-Aufgabe (bis 10 mol 20) gewürfelt, déi Kleng hun Additiounen am Zueleraum bis 20 gemaach.