Meng Klass - Blog

No e puer organisatoresche Schwieregkeeten kann eist 4. Schouljoer erem an de RedRockClimbingCenter klotere goen. No enger éischter Kéier mat vill Erklärungen hun d'Kanner sech haut een deen anere geséchert. Déi éischt Héichtenangscht ass och iwwerwonnen.

Elo schon e grousse Merci un eis Maison Relais, déi eis gutt ënnerstëtzt.

Mir hunn dest Joer mat der Akrobatik am Turnen ugefaang. Grad am Ufank vum Joer ass dat e flott Thema, well géigesäitegt Vertrauen geübt gëtt. Dat fällt net ëmmer liicht... Verschidde Figure sinn einfach - heiansdo zimlech witzeg - anerer si scho méi schwiereg. Wichteg ass, ëmmer ganz genee ze wëssen, wou ech mech op engem Kolleg ofstäipe kann.

Mir hu vum gudde Wieder profitéiert fir eng Aktivitéit dobaussen ze maachen. An Dräiergruppen haten d'Kanner e Bestëmmungsbuch. Si sollten esou vill wéi méiglech verschidde Planzen (an e puer kleng Déieren) fannen a bestëmmen. Fir déi méi schwiereg Fäll oder déi, déi net am Schoul-Bestëmmungsbuch ze fanne waren hate mer och nach méi komplett Bestëmmungsbicher dobäi. Déi nächst Woch ginn all des Impressiounen um Bookcreator verschafft...